කරගම්පිටිය සතිපොළේ මාළු විකුණූ කාන්තාවකට කොරෝනා – දෙහිවල ඩෙන්ටල් එකකටත් ගිහින්

266

රත්මලාන කඳවල පාර සඳුන්ගම රතුකුරුස නිවාස සංකීර්ණයේ වයස අවුරුදු 63 ක කාන්තාවක් උණ සහ කැස්ස හේතුවෙන්  කළුබෝවිල මූලික රෝහලට ඇතුළත් කර ඇති අතර  කළුබෝවිල රෝහලේදී සිදුකළ පරීක්ෂණ වලදී එම කාන්තාවට කොරෝනා ආසාදනය වී ඇති බව අනාවරණය වූ කොවිඩ්  වැලැක්වීම පිලිබඳ ජාතික ක්‍රියාන්විත මධ්‍යස්ථානය පවසානවා.

මෙම කාන්තාව දෙහිවල කරගම්පිටිය සතිපොළේ මාළු වෙළඳාමේ නිරත වූ කාන්තාවක් බවත් එම කාන්තාවගෙන් මාළු මිලදී ගත් අය සිටී නම් වෛද්‍ය උපදෙස් ලබා ගන්නා ලෙස දැනුම් දීමක් කර තිබෙනවා.

එසේම මෙම කාන්තාව දෙහිවල පිහිටි පෞද්ගලික දන්ත වෛද්‍ය ආයතනයකටද ගොස් ප්‍රතිකාර ලබාගෙන ඇති බවද පවසනවා.

එම කාන්තාව වාසය කළ සඳුන්ගම රතුකුරුස වත්ත නිවාස සංකීර්ණයේ  ගෙවල් 10 පුද්ගලයින් 34 නිවාස වල  ස්වයං නිරෝධායන සඳහා කටයුතු කළ අතර එම කාන්තාව ළඟින්ම ඇසුරු කළ  තවත් පවුල් 04 ක 22ක් මාදම්පේ නිරෝධන මධ්‍යස්ථානය වෙත යොමුකිරීමට කටයුතු කර තිබෙනවා.

දෙහිවල ගල්කිස්ස නගර සභාවේ මහජන සෞඛ්‍ය පරීක්ෂකවරුන් සහ රත්මලාන මහජන සෞඛ්‍ය පරීක්ෂක කාර්යාලය නිලධාරීන් සහ ගල්කිස්ස පොලිසිය එකතුව මේ පිළිබඳව විමර්ශන සිදුකරනවා.

මෙම කාන්තාවට කොරෝනා ආසාදනය වූ ආකාරය අනාවරණය කර ගැනීමට මේවන විටත් නොහැකි වී තිබෙනවා.